«Մենք կկատարենք այն, ինչ մտնում է մեր լիազորության սահմաններում»,- այսպես այսօր ՀՀ գյուղատնտեսության նախարար Սերգո Կարապետյանը պատասխանեց պատգամավոր Անահիտ Բախշյանի հարցին, թե եթե «Սննդամթերքի անվտանգության մասին» ՀՀ օրենքի նախագիծն ընդունվի, ի՞նչ բազա ու լծակներ ունի նախարարությունը, որ արդյունավետ պատժի այն ձեռնարկատերերին, ովքեր վատ արտադրանք են տալիս` այծի կաթի օրինակով:
«Դուք ինքնե՞րդ կպատժեք, թե՞ կուղարկեք դատախազություն, որտեղ կջրվի»,- հարցրեց Բախշյանը` հավելելով, որ կարծում է` Գյուղատնտեսության շահերից բխող ոստիկանություն պիտի ունենա նախարարությունը, իսկ սնունդ արտադրող ընկերությունը իր անունի համար պիտի բծախնդիր աշխատի ու դողա իր արտադրած սնունդի համար:
Նախարարը պատասխանեց, որ նախարարությունն ուսումնասիրություն է անցկացնում արտադրության պրոցեսում, ինչը վերահսկելի է, իսկ օրենքի նախագծի ընդունմամբ 2006 թ.-ից խախտում կատարողները, որոնք մինչ օրս պատասխանատվության չեն ենթարկվել, կենթարկվեն:
Նշենք, որ «Սննդամթերքի անվտանգության մասին» օրենքի նախագծով արգելվում է Հայաստանի Հանրապետություն ներմուծել, իրացնել կամ հանրային սննդի ծառայությունների ոլորտում օգտագործել այնպիսի սննդամթերք, սննդամթերքի հետ շփվող նյութեր կամ սննդային հավելումներ, որոնց պիտանիության ժամկետն անցած է, փաթեթավորման, սպառողական տարայի կամ պիտակի վրա կամ ուղեկցող փաստաթղթերում պիտանիության ժամկետի նշումը բացակայում է կամ աղավաղված է, պիտանիության ժամկետը կրկնակի մակնշված է կամ արտադրողի կողմից նշված բնօրինակ ժամկետը ջնջված եւ նշված է նոր պիտանիության ժամկետ:
Օրենքի նախագծով արգելվում է նաև Հայաստանի Հանրապետություն ներմուծված փաթեթավորված սննդամթերքի, սննդամթերքի հետ շփվող նյութերի եւ սննդային հավելումների հայերեն լեզվով մակնշումը փակցնել արտադրողի կողմից նշված բնօրինակ պիտանիության ժամկետի վրա»: