Հոլանդիայից ներկրված երինջները հարմարվում  են Շիրակի պայմաններին: Երինջների ներկրումն իրականացվում է  պետական ծրագրով՝  սկսած 2010  թվականից: Այս տարի մարզում կա երկու տնտեսություն, որտեղ պահում են ներկրած անասուններին՝ 6  գլուխ Հացիկում եւ 14-ը Ազատանում: Նրանք մսուրում պահվող եւ բավական մեծ խնամք պահանջող կենդանիներ են: Ինչպես տեղեկացրեց Շիրակի մարզպետարանի գյուղատնտեսության վարչության պետ Մովսես Մանուկյանը, երինջները հարմարվել են պայմաններին, նրանց վիճակը բավականին լավ է: Ծրագրի արդյունավետությունը տեսանելի կլինի ավելի ուշ՝ աշնանը, կամ նույնիսկ հաջորդ գարուն, երբ երինջներն արդեն նոր սերունդ կտան: Այդ ժամանակ հնարավոր կլինի խոսել նաեւ կաթի ծավալների մասին:

«Եթե համեմատում ենք մեր կովկասյան գորշ տեսակի հետ, որը կիսալեռնային պահվածքի անասուն է, Հոլանդիայից ներկրված երինջները միայն մսուրային պահվածքի են` կերի մեծ ծավալներով: Մինչ արդյունքների տեսանելի լինելը մարզը  ՀՀ գյուղատնտեսության նախարարություն է ներկայացրել  նոր երինջներ ներկրելու 98  նոր հայտ: Ներկրվելու դեպքում  դրանք կտրամադրվեն միայն այն տնտեսություններին, որոնք ունեն համապատասխան պայմաններ»,- նշեց   Մանուկյանը: