Շիրակի մարզում մեկնարկել է ՀՀ գյուղատնտեսության նախարարության «Սերմնաբուծության եւ սերմնարտադրության զարգացման ծրագրի» շրջանակներում  Ռուսաստանի Դաշնությունից ներկրված աշնանացան ցորենի էլիտար սերմնացուի բաշխման գործընթացը: Այս անգամ մարզ է ներկրվել 120 տոննա սերմնացու: Մարզի` ծրագրում ընդգրկված բարձրադիր համայնքներին արդեն ամբողջությամբ տրամադրվել է նախատեսված քանակը:

Ինչպես  տեղեկացրեց Շիրակի մարզպետարանի գյուղատնտեսության վարչության պետ Մովսես Մանուկյանը` ծրագրում ընդգրկված է 42 շահառու ութ համայնքից: Յուրաքանչյուր շահառուի 1 հեկտարի տրամադրվում է 300 կիլոգրամ սերմնացու: Այս անգամ մարզ է ներկրվել հացահատիկի սերմացուի միայն «Կրասնոդար 99» տեսակը: «Սա բարձր որակի, փորձարկում անցած տեսակ է եւ լավ է հարմարվում Շիրակի պայմաններին: Այս տեսակը անցած տարի եւս ներկրվել էր մարզ, բայց քիչ քանակությամբ»,-նշեց Մ. Մանուկյանը:

Ի դեպ` այն տնտեսությունները, որոնք անցած տարի ընդգրկել էին ծրագրում եւ ցանկություն են հայտնել այս տարի եւս դառնալ շահառու, կօգտվեն սերմացուից` միայն մինչ այդ ստացած ծավալների վերադարձելիությունն ապահովվելու դեպքում: 
                Որպես պայման` բարձր բերքատվություն ապահովելու համար սերմացուն տրամադրվում է այն ֆերմերային տնտեսություններին, որոնք նախորդ տարի այդ հողատարածքներում հացազգի չեն մշակել: Բացի այդ` սերմացուն տրամադրվում է 7 եւ ավելի հեկտար ունեցող տնտեսություններին:

Խորհրդատվություն ՌԴ Հայաստան ներկրված ցորենի սորտերի նկարագրությունը>>