Հայաստանում ձկնաբուծական տնտեսությունները ձկներին կերակրում են ոչ թե հորմոնալ, այլ Եվրոպայից ներկրված հատուկ կերերով: «Արմենպրես»-ի հաղորդմամբ` այս մասին հուլիսի 31-ին լրագրողների հետ հանդիպման ժամանակ ասաց «Հայ ձկնաբույծների միավորում» հասարակական կազմակերպության գործադիր տնօրեն Արթուր Աթոյանը: «Ես կարող եմ երաշխավորել, որ ինչպես մեր կազմակերպության անդամ, այնպես էլ այլ ձկնաբուծական տնտեսություններ, հորմոնալ կերեր չեն օգտագործում: Պետական մակարդակով սահմանի վրա համապատասխան միջոցառումներ են կիրառվում նման կերերի ներկրումն արգելելու համար»,- ասաց կազմակերպության տնօրենը:

Պաշտոնական տվյալներով` Հայաստանում ձկանբուծությամբ զբաղվելու թույլտվություն ունեն 234 տնտեսություններ, որոնցից շատերը ներկայում տարբեր խնդիրների պատճառով չեն գործում: Հայ ձկնաբույծների խնդրանքով, մոտ երկու ամիս առաջ վարչապետ Տիգրան Սարգսյանի հրամանով ստեղծված միջգերատեսչական հանձնաժողովն աշխատանքներ է տանում ձկնաբուծական տնտեսությունների առջև ծառացած խնդրիները լուծելու նպատակով: Ձկանբուծարաններում առկա մի շարք խնդիրների քննարկման և դրանց վերացման համար տարբեր առաջարկներով և խնդրանքներով կազմակերպությունն արդեն դիմել է հանձնաժողովին: «Ներկայում քննարկման փուլում է գտնվում ջրի որակի ստանդարտացման մասին օրինագիծը, համաձայն որի` ջրի ստանդարտացման ժամկետները պետք է երկարացվեն»,- հայտնեց Աթոյանը:

Յուրաքանչյուր երեք տարին մեկ ձկնաբույծները պետք է նոր փաստաթղթեր ներկայացնեն իրենց գործունեության մասին, ինչը, ձկնաբույծների միավորման տնօրենի խոսքով, լուրջ խնդիր է տնտեսվարողների համար: «Եթե նախկինում պահանջվում էր ընդամենը հինգ փաստաթուղթ, ապա այժմ դրանց թիվը հասել է տասներեքի: Ձկանբույծն իր գործի մասնագետ է, իսկ այստեղ այլ մասնագիտական եւ տեղեկատվական խնդիր կա»,- նշեց բանախոսը:

Արտահանման գործընթացում ևս խնդիրներ կան, մասնավորապես` Ռուսաստանի Դաշնություն: «Ձկնաարտահանման ոլորտում մեր մրցակից պետությունները` Թուրքիան և Նորվեգիան, ավելի ցածր գներով են առաջարկում իրենց արտադրանքը, իսկ մենք Ռուսաստանից բացի այլ «արժեքավոր» շուկա չունենք»,- նկատում է Արթուր Աթոյանը:

Հանձնաժողովն արդեն աշխատանքներ է տանում վերացնելու ոչ միայն այդ խոչնդոտը, այլև պայմաններ ստեղծելու, որ հայկական ձկնամթերքներն արտահանվեն նաև եվրոպական երկրներ:

armenpress.am