«Ֆեռո», «Վալետտա», «Բյուրակն», «Վանս գրուպ», «Ասկոլիո» ընկերությունները սուրճի շուկայում խաբում եւ մոլորեցնում են սպառողներին' իրացնելով ակնհայտորեն բաղադրությանը չհամապատասխանող սուրճ:
Այս մասին տեղեկացնում են ՀՀ տնտեսական մրցակցության պաշտպանության պետական հանձնաժողովից' ընդգծելով, որ շուկայում ձեռք բերված արտադրանքը հանձնվել է լաբորատոր փորձաքննության, որպեսզի ուսումնասիրվի սուրճի բաղադրությունը' քանի որ առանց բացառության բոլոր տուփերի վրա մակնշված է, որ այն պարունակում է միայն բարձրորակ' հարյուր տոկոսանոց սուրճ' առանց հավելանյութերի:
Այս ընկերությունների համապատասխան անվանումներով արտադրանքի փորձաքննությամբ բացահայտվել է, որ դրանք պարունակում են մեծ քանակությամբ կողմնակի խառնուրդներ, որոնք, ըստ փորձագետների' կարող են լինել ցորեն, գարի եւ կաղին:
Հանձնաժողովի դիտարկմամբ' վերոնշյալ ընկերությունները բարեխիղճ տնտեսվարողների նկատմամբ ստացել են մրցակցային լուրջ առավելություններ, քանի որ շնորհիվ էժանագին հավելանյութերի, կարողացել են սուրճը իրացնել անհամեմատ ցածր գնով:
Համաձայն օրենքի' տնտեսվարողի ցանկացած վարքագիծ, որը կարող է մոլորեցնել հասարակությանը նրա առաջարկած ապրանքների վերաբերյալ, համարվում է անբարեխիղճ մրցակցության գործողություն: Տվյալ դեպքում, տնտեսվարողների վարքագիծը անբարեխիղճ մրցակցության դրսեւորում է, ինչի համար նրանցից յուրաքանչյուրի հանդեպ կիրառվելու է 5 մլն դրամի տուգանք:
armenpress.am