ՀՀ փոխվարչապետ, տարածքային կառավարման նախարար Արմեն Գեւորգյանի մոտ այսօր տեղի ունեցավ մարզպետների մասնակցությամբ այս տարվա առաջին խորհրդակցությունը:
Գյուղատնտեսության փոխնախարար Սամվել Գալստյանը մարզպետներին տեղեկություններ ներկայացրեց հողօգտագործողներին մատչելի գներով ազոտական պարարտանյութի ձեռքբերման նպատակով պետական աջակցության ծրագրի իրականացման ընթացակարգերի մասին: Փոխվարչապետը մարզպետներին հանձնարարեց Գյուղատնտեսության նախարարության հետ համատեղ աշխատանքները կազմակերպել այնպես, որպեսզի պահպանվեն սահմանված ընթացակարգերն ու ժամկետները:
Ս. Գալստյանը տվյալներ ներկայացրեց նաեւ սերմնաբուծության եւ սերմարտադրության ծրագրի արդյունքների մասին: Նշվեց, որ ծրագիրն ընդհանուր առմամբ հաջողությամբ է իրականացվում, միայն որոշ մարզերում` Արագածոտնում, Արմավիրում, Գեղարքունիքում եւ Տավուշում, սերմացուի վերադարձելիության մակարդակը բավարար չէ: Մարզպետներին հանձնարարվեց տեղերում քննարկել խնդիրը, քայլեր ձեռնարկել վերադարձելիության ապահովման ուղղությամբ:
Քննարկվեցին նոր ֆինանսական տարում դպրոցներում աշխատավարձի ֆոնդի հետ կապված խնդիրներ` հաշվի առնելով ՀՀ կառավարության 2011թ. հուլիսի 28-ի N 1088-Ն որոշմամբ սահմանված ժամաքանակները եւ դրանց հիման վրա հաշվարկված գործակիցները: Հանձնարարվեց Տարածքային կառավարման, Կրթության եւ գիտության, Ֆինանսների նախարարություններին մեկշաբաթյա ժամկետում ուսումնասիրել առաջացած խնդիրները եւ դրանց կարգավորման վերաբերյալ առաջարկություններ ներկայացնել:
Քննարկվեցին նաեւ «Վարչական հսկողության իրականացման եւ կադրային գործի վարման ընդհանուր դրույթներե մեթոդական ուղեցույցի նախագծի վերաբերյալ մարզպետարաններից ստացված առաջարկությունները: Որոշվեց երկշաբաթյա ժամկետում ամփոփել աշխատանքները: Փոխվարչապետն առաջարկեց 2012թ. ծրագրերով նախատեսված աշխատանքներն իրականացնել նշված ուղեցույցի հիման վրա:
Մարզպետներին հանձնարարվեց մինչեւ հունվարի 16-ն ամփոփել տեղական բյուջեների կատարման աշխատանքները եւ արդյունքները ներկայացնել Տարածքային կառավարման նախարարություն, որոնք կքննարկվեն ՏԿՆ կոլեգիայի առաջիկա նիստում:
Խորհրդակցությանը քննարկվեցին մի շարք այլ հարցեր եւս:
|